"Luns de Cine"...

O CONCELLO DE ARES COMEZA O DÍA 15 O CICLO "LUNS DE CINE" COA PROXECCIÓN DA PELÍCULA "A ATLÁNTIDA"

A iniciativa da Concellaría de Cultura enmárcase dentro do programa "Cinemas Dixitais", promovido pola Consellería de Cultura da Xunta de Galicia

Co obxectivo de achegar o cine galego á poboación aresana, ponse en marcha o ciclo "Luns de Cine", un programa que se enmarca dentro de "Cinemas Dixitais" e que promove a Consellería de Cultura, a través da Dirección Xeral de Creación e Difusión Cultural e a Axencia Galega, co IGAEM e coa colaboración, neste caso, do Concello de Ares.

O salón de actos da Alianza Aresana –o programa tamén pretende recuperar e extender os espazos de exhibición pública nos teatros, auditorios e casas da cultura dos pobos galegos- será o escenario destas proxeccións, que se iniciarán o vindeiro luns, día 15, ás oito da tarde.

"A Atlántida" é o título elixido para o primeiro pase, que terá continuidade ata o día 3 de decembro.

Aínda que nun principio exhibiranse oito películas, a Concellaría de Cultura está traballando coa Axencia audiovisual Galega para continuar coa iniciativa, sempre e cando ésta teña unha boa acollida por parte dos aresáns. A entrada a tódalas proxeccións é gratuita.

Este primeiro ciclo inclúe telefilmes feitos en Galicia, ao que seguirán proximamente, segundo informa a Consellería de Cultura, outras produccións agrupadas en diferentes temáticas.

Á proxección de "A Atlántida" seguirá "A biblioteca da iguana" –día 22-; "Condenado a vivir" –día 29-; "Entre bateas" -5 de novembro-; "Jalisco" –día 12-; "Máis ca irmáns" –día 19-; "O tesouro (de Ánxel Fole)" –día 26-; e "O partido" –o 3 de decembro-.

A concelleira de Cultura fai un chamamento aos aresáns para que participen nesta iniciativa, na que se poderán ver de forma totalmente gratuita algunhas das mellores produccións feitas en Galicia.